"Z","5","1","לַמְנַצֵּחַ אֶֽל הַנְּחִילוֹת מִזְמוֹר לְדָוִֽד "
"Z","5","2","אֲמָרַי הַאֲזִינָה יְהוָה בִּינָה הֲגִֽיגִי "
"Z","5","3","הַקְשִׁיבָה לְקוֹל שַׁוְעִי מַלְכִּי וֵאלֹהָי כִּֽי אֵלֶיךָ אֶתְפַּלָּֽל "
"Z","5","4","יְֽהוָה בֹּקֶר תִּשְׁמַע קוֹלִי בֹּקֶר אֶֽעֱרָךְ לְךָ וַאֲצַפֶּֽה "
"Z","5","5","כִּי לֹא אֵֽל חָפֵץ רֶשַׁע אָתָּה לֹא יְגֻרְךָ רָֽע "
"Z","5","6","לֹֽא יִתְיַצְּבוּ הֽוֹלְלִים לְנֶגֶד עֵינֶיךָ שָׂנֵאתָ כָּל פֹּעֲלֵי אָֽוֶן "
"Z","5","7","תְּאַבֵּד דֹּבְרֵי כָזָב אִישׁ דָּמִים וּמִרְמָה יְתָעֵב יְהוָֽה "
"Z","5","8","וַאֲנִי בְּרֹב חַסְדְּךָ אָבוֹא בֵיתֶךָ אֶשְׁתַּחֲוֶה אֶל הֵֽיכַל קָדְשְׁךָ בְּיִרְאָתֶֽךָ "
"Z","5","9","יְהוָה נְחֵנִי בְצִדְקָתֶךָ לְמַעַן שׁוֹרְרָי הושר הַיְשַׁר לְפָנַי דַּרְכֶּֽךָ "
"Z","5","10","כִּי אֵין בְּפִיהוּ נְכוֹנָה קִרְבָּם הַוּוֹת קֶֽבֶר פָּתוּחַ גְּרוֹנָם לְשׁוֹנָם יַחֲלִֽיקוּן "
"Z","5","11","הַֽאֲשִׁימֵם אֱ‍ֽלֹהִים יִפְּלוּ מִֽמֹּעֲצוֹתֵיהֶם בְּרֹב פִּשְׁעֵיהֶם הַדִּיחֵמוֹ כִּי מָרוּ בָֽךְ "
"Z","5","12","וְיִשְׂמְחוּ כָל חוֹסֵי בָךְ לְעוֹלָם יְרַנֵּנוּ וְתָסֵךְ עָלֵימוֹ וְֽיַעְלְצוּ בְךָ אֹהֲבֵי שְׁמֶֽךָ "
"Z","5","13","כִּֽי אַתָּה תְּבָרֵךְ צַדִּיק יְהוָה כַּצִּנָּה רָצוֹן תַּעְטְרֶֽנּוּ "